വെറുതെ നിന്നാലും പൊണ്ണത്തടി കുറയും!

വെറുതെ നിന്ന് നമുക്ക് തടി കുറയ്ക്കാം. കേള്‍ക്കുമ്പോള്‍ തമാശയായി തോന്നുമെങ്കിലും സംഗതി സത്യമാണ്. ദിവസേന ഇരിക്കുന്ന സമയം കുറച്ച് നിന്ന് നോക്കൂ, വൈകാതെ തന്നെ തടി കുറയുന്നത് കാണാം.

വെറുതെ നില്‍ക്കുന്നത് എങ്ങനെ തടി കുറക്കാന്‍ സഹായിക്കും എന്ന് നോക്കാം:

ദിവസം മുഴുവന്‍ ഇരിക്കുന്നത് ശരീരം ഭരം വര്‍ധിപ്പിക്കും എന്നാണ് പഠനങ്ങള്‍ വ്യക്തമാക്കുന്നത്. ഇത്തരത്തില്‍ ദിവസം മുഴുവന്‍ ഇരിക്കുന്നത് കൊണ്ട് ശരീര ഭാരം വര്‍ധിക്കുന്നുവെന്ന് മാത്രമല്ല ആരോഗ്യപരമായും ഒരുപാട് ദോഷങ്ങള്‍ ശരീരത്തിന് ഉണ്ടാകുന്നു. ന്യൂയോര്‍ക്കിലെ റോച്ചസ്റ്ററിലെ മയോ ക്ലിനിക്കില്‍ നടന്ന പഠനത്തില്‍ വ്യക്തമാക്കുന്നത് എന്താണെന്ന് വെച്ചാല്‍ ദിവസവും ഇത്തരത്തില്‍ ഇരുന്ന് ജോലി ചെയ്യുന്നത് ശരീരഭാരം വര്‍ധിപ്പിക്കാനും വയറ് കൂടാനും ഇടവരുത്തുന്നു എന്നാണ്, കൂടാതെ നില്‍ക്കുന്നവരില്‍ കലോറി എരിഞ്ഞു തീരുന്നതായും പഠനത്തില്‍ വ്യക്തമാക്കുന്നു. മയോ ക്ലിനിക്കിലെ കാര്‍ഡിയോളജിസ്റ്റായ ഡോ. ഫ്രാന്‍സിസ്‌കോ ലോപ്പസ് – ജിമെനെസിന്റെ നേതൃത്വത്തില്‍ നടത്തിയ പഠന റിപ്പോര്‍ട്ടിലാണ് ഇക്കാര്യം പറയുന്നത്.

നില്‍ക്കുമ്പോള്‍ 0.15 കൂടുതല്‍ കലോറി ഒരു മിനിറ്റില്‍ എരിഞ്ഞു തീരുന്നതായാണ് കണ്ടെത്തലില്‍ പറയുന്നത്. അതായത് 65 കിലോ ഗ്രാം ശരീര ഭാരമുള്ളയാള്‍ ആറ് മണിക്കൂര്‍ ദിവസവും നില്‍ക്കുമ്പോള്‍ 54 കലോറി വരെ കുറയുമെന്നാണ് പഠനങ്ങളില്‍ വ്യക്തമാക്കുന്നത്. 13 മണിക്കൂര്‍ വരെ ഇരുന്ന് ജോലി ചെയ്യുകയും എട്ടു മണിക്കൂര്‍ ഉറങ്ങുകയും ചെയ്യുന്ന ഒരാളുടെ ദിവസത്തിലെ 21 മണിക്കൂര്‍ പ്രവര്‍ത്തന രഹിതമായാണ് കടന്നു പോകുന്നതെന്നാണ് പഠനത്തില്‍ പറയുന്നത്. ഓഫീസുകളില്‍ നിരന്തരം ഇരുന്ന് ജോലി ചെയ്യുന്നവര്‍ ഇനി മുതല്‍ കസേര ഉപേക്ഷിച്ച് സ്റ്റാന്‍ഡിംഗ് ഡെസ്‌ക് തെരഞ്ഞെടുക്കാവുന്നതാണ്. ആരോഗ്യമുള്ള ശരീരത്തിനും പൊണ്ണത്തടി കുറക്കാനും ഇനിമുതല്‍ നിന്ന് കൊണ്ട് ഒന്ന് പരീക്ഷിച്ചു നോക്കു. ശരീരത്തില്‍ അല്‍പം ഭാരം ഉണ്ടാകുന്നതില്‍ വലിയ പ്രശ്നമില്ല. എന്നാല്‍ അത് അമിതമാകമ്പോഴാണ് പ്രശ്നങ്ങള്‍ ഉണ്ടാകുന്നത്. നിങ്ങള്‍ക്ക് അമിതഭാരമാണോ പൊണ്ണത്തടിയാണോ ഉള്ളത് എന്ന് എങ്ങനെ കണ്ടെത്താം എന്ന് നോക്കാം.

ബോഡി മാസ് ഇന്‍ഡക്സ്, അതായത് ബിഎംഐ 30ല്‍ കൂടുന്നത് പൊണ്ണത്തടിയാണ്. കൂടാതെ 25നും 30നും ഇടയില്‍ ബിഎംഐ കൂടുന്നത് അമിതഭാരവുമാണ്. മാത്രമല്ല ഇത്തരത്തില്‍ പൊണ്ണത്തടിയുള്ളവരില്‍ ഹൃദയ രോഗങ്ങള്‍ വര്‍ധിക്കുമെന്ന് പഠനങ്ങള്‍ വ്യക്തമാക്കുന്നു. പൊണ്ണത്തടി ലെഫ്റ്റ് വെന്‍ട്രിക്കുലാര്‍ ഹൈപ്പര്‍ട്രോഫി എന്ന ഇടത് വെന്‍ട്രിക്കിളിന്റെ ഭിത്തിക്ക് കട്ടി കൂടുന്ന തരത്തിലുള്ള രോഗങ്ങള്‍ക്ക് കാരണമാകും. നീണ്ടു നില്‍ക്കുന്ന എല്‍വിഎച്ച് ഹൃദയ രോഗങ്ങളിലേക്ക് നയിച്ചേക്കുമെന്നാണ് ആരോഗ്യ വിദഗ്ദര്‍ അഭിപ്രായപ്പെടുന്നത്. പുരുഷന്മാരില്‍ അരയുടെ ചുറ്റളവ് 40 ഇഞ്ചില്‍ കൂടുന്നതും സ്ത്രീകളില്‍ 35 ഇഞ്ചില്‍ കൂടുന്നതും ഹൃദ്രോഗ സാധ്യത ഉണ്ടാകാനുള്ള സൂചനയാണെന്നാണ് പഠനങ്ങള്‍ വ്യക്തമാക്കുന്നത്.

ബിഎംഐ അഥവാ ബോഡി മാസ് ഇന്‍ഡക്സ് എങ്ങനെ കാണാം

കിലോ ഗ്രാമിലുള്ള ഭാരത്തെ മീറ്ററിലുള്ള ഉയരത്തിന്റെ വര്‍ഗം കൊണ്ട് ഹരിച്ചാല്‍ കിട്ടുന്ന സംഖ്യയാണ് ബോഡി മാസ് ഇന്‍ഡക്സ്. ഇത് 25ന് താഴെ നില്‍ക്കുന്നതാണ് ഏറ്റവും നല്ലത്. 25നും 30നും ഇടയിലാണെങ്കില്‍ തൂക്കം കൂടുതലാണെന്ന് അര്‍ത്ഥം. 30ന് മുകളിലാണെങ്കില്‍ പൊണ്ണത്തടിയും. നമ്മുടെ തിരക്കുകള്‍ക്കിടയില്‍ ഇതൊന്നും അറിയാതെ പോകുകയാണ്. തിരക്കുകളോടൊപ്പം തന്നെ ആരോഗ്യ കാര്യങ്ങളും അറിഞ്ഞില്ലെങ്കില്‍ ഒരു പക്ഷെ അത് പിന്നീട് നിങ്ങളെ വലിയ വലിയ രോഗങ്ങളിലേക്കായിരിക്കും കൊണ്ടെത്തിക്കുക. അത് കൊണ്ട് നിങ്ങളുടെ ആരോഗ്യ കാര്യത്തില്‍ നിങ്ങള്‍ അതീവ ശ്രദ്ധ ചെലുത്തേണ്ടത് അത്യാവശ്യമാണ്.

share this post on...

Related posts