ഐഫോൺ 13 വില്പന തുടങ്ങി; വില, ഓഫറുകളറിയാം

ഈ മാസം 14ന് ആപ്പിൾ വിപണിയിലെത്തിച്ച ഏറ്റവും പുതിയ ഐഫോൺ ശ്രേണിയായ ഐഫോൺ 13ന്റെ വില്പന ആരംഭിച്ചു. ഇന്ന് (സെപ്റ്റംബർ 24) പകൽ 8 മണിയോടെയാണ് ഐഫോൺ 13, ഐഫോൺ 13 മിനി, ഐഫോൺ 13 പ്രോ, ഐഫോൺ 13 പ്രോ മാക്സ് എന്നിങ്ങനെ നാല് ഫോണുകൾ ഉൾകൊള്ളുന്ന ഐഫോൺ 13 ശ്രേണിയുടെ വില്പന ആരംഭിച്ചത്. ഇന്ത്യയ്ക്ക് പുറമേ, ഓസ്‌ട്രേലിയ, കാനഡ, ചൈന, ജർമ്മനി, ജപ്പാൻ, യുകെ, യുഎസ് എന്നീ രാജ്യങ്ങളിലും ഐഫോൺ 13 വില്പന ഇന്നാണ് ആരംഭിക്കുക.

ഔദ്യോഗിക റീട്ടെയിൽ ഔട്ട്ലെറ്റുകൾ വഴിയും ആപ്പിൾ സ്റ്റോർ ഓൺലൈൻ വഴിയും രാജ്യത്തെ ഇ-കൊമേഴ്സ് സൈറ്റുകൾ വഴിയുമാണ് ഐഫോൺ 13ന്റെ വില്പന ക്രമീകരിച്ചിരിക്കുന്നത്. ഇത് കൂടാതെ വിജയ് സെയിൽസ്, റിലയൻസ് ഡിജിറ്റൽ, ക്രോമ എന്നീ റീട്ടെയിൽ ശൃംഖലകൾ വഴിയും ഐഫോൺ 13 വാങ്ങാം.

​ഐഫോൺ 13 – വില

ഐഫോൺ 13, ഐഫോൺ 13 മിനി എന്നിവ മൂന്ന് സ്റ്റോറേജ് ഓപ്ഷനുകളിലാണ് വിപണിയിലെത്തിയിരിക്കുന്നത്. ഐഫോൺ 13 മിനി 128 ജിബിയുടെ വില 69,900 രൂപയാണ്. ഐഫോൺ 13 മിനിയുടെ 256 ജിബി പതിപ്പിന്റെ വില 79,900 രൂപയും 512 ജിബി പതിപ്പിന്റെ വില 99,900 രൂപയുമാണ്. ഐഫോൺ 13ന്റെ 128 ജിബിയ്ക്ക് അതെ സമയം 79,900 രൂപയും, 256 ജിബിയ്ക്ക് 89,900 രൂപയും, 512 ജിബി പതിപ്പിന് 99,900 രൂപയുമാണ് വില.

128 ജിബി, 256 ജിബി, 512 ജിബി പതിപ്പുകൾ കൂടാതെ പുതുതായി 1 ടിബി പതിപ്പിലും ഐഫോൺ 13 പ്രോ, ഐഫോൺ 13 പ്രോ മാക്‌സ് മാക്‌സ് പതിപ്പുകൾ വാങ്ങാം. ഐഫോൺ 13 പ്രോയുടെ 128 ജിബി പതിപ്പിന് 1,19,900 രൂപ, 256 ജിബി പതിപ്പിന് 1,29,900 രൂപ, 512 ജിബി പതിപ്പിന് 1,49,900 രൂപ, 1 ടിബിക്ക് 1,69,900 രൂപ എന്നിങ്ങനെയാണ് വിലകൾ. ഐഫോൺ 13 ശ്രേണിയിലെ ഏറ്റവും പ്രീമിയം താരമായ ഐഫോൺ 13 പ്രോ മാക്സിൻ്റെ 128 ജിബി പതിപ്പിന് 1,29,900 രൂപയും, 256 ജിബി പതിപ്പിന് 1,39,900 രൂപയും, 512 ജിബി പതിപ്പിന് 1,59,900 രൂപയും, 1 ടിബി മോഡലിന് 1,79,900 രൂപയും ചെലവഴിക്കണം.

​ഐഫോൺ 13 – ഓഫറുകൾ

ആപ്പിൾ അംഗീകൃത വിതരണക്കാർ വഴി എച്ഡിഎഫ്സി ബാങ്ക് കാർഡ് ഉപയോഗിച്ച് ഐഫോൺ 13, ഐഫോൺ 13 മിനി വാങ്ങുമ്പോൾ 6,000 രൂപ ക്യാഷ്ബാക്ക് ലഭിക്കും. അതെ സമയം എച്ഡിഎഫ്സി ബാങ്ക് കാർഡ് ഉപയോഗിച്ച് ഐഫോൺ 13 പ്രോ, ഐഫോൺ 13 പ്രോ മാക്സ് ഫോണുകൾ വാങ്ങുമ്പോൾ 5,000 രൂപയാണ് ക്യാഷ്ബാക്ക്.

ഇതുകൂടാതെ പഴയ ഐഫോൺ മോഡലുകൾക്ക് എക്സ്ചേഞ്ച് ഓഫറും ആപ്പിൾ ഒരുക്കിയിട്ടുണ്ട്. ഐഫോൺ 12 ശ്രേണി, ഐഫോൺ 11 ശ്രേണി, ഐഫോൺ Xs ശ്രേണി, ഐഫോൺ X, ഐഫോൺ 8 എന്നീ ഫോണുകൾക്കാണ് 9,000 രൂപ മുതൽ 46,120 രൂപ വരെ എക്സ്ചേഞ്ച് ഓഫർ ഒരുക്കിയിരിക്കുന്നത്.

​ഐഫോൺ 13 – പ്രോസസ്സർ, ബാറ്ററി

ആപ്പിളിന്റെ പുതിയ A15 ബയോണിക് SoC ചിപ്പാണ് ഐഫോൺ 13 ശ്രേണിയിലുള്ള ഫോണുകളുടെ ഹൃദയം. ഐഫോൺ 12 ശ്രേണിയുടെ A14 ബയോണിക് ചിപ്പിനേക്കാൾ 50 ശതമാനം കൂടുതൽ മികച്ച പ്രകടനം കാഴ്ച വയ്ക്കുന്നതാണ് A15 ബയോണിക് ചിപ്പ് എന്നാണ് ആപ്പിളിന്റെ അവകാശവാദം. ഐഫോൺ 13, ഐഫോൺ 13 മിനി എന്നീ പതിപ്പുകളിൽ നാല് കോർ ജിപിയുവുള്ള A15 ബയോണിക് ചിപ്പ് ഇടം പിടിച്ചിരിക്കുമ്പോൾ ഐഫോൺ 13 പ്രോ, പ്രോ മാക്‌സ് പതിപ്പുകളിൽ അഞ്ച് കോർ ഇന്റഗ്രേറ്റഡ് ജിപിയുവാണ്. ഐഫോൺ 13 മോഡലുകളുടെ റാമും ബാറ്ററി കപ്പാസിറ്റിയും എത്ര എന്ന് ആപ്പിൾ വെളിപ്പെടുത്തിയിട്ടില്ല. ഐഫോൺ 13 മിനി, ഐഫോൺ 13 പ്രോ എന്നിവയ്ക്ക് മുൻഗാമികളുമായി താരതമ്യപ്പെടുത്തുമ്പോൾ 1.5 മണിക്കൂർ മെച്ചപ്പെട്ട ബാറ്ററി ലൈഫുണ്ട് എന്നാണ് അവകാശവാദം. അതേസമയം ഐഫോൺ 13, ഐഫോൺ 13 പ്രോ മാക്സ് എന്നിവ മുന്ഗാമികളെക്കാൾ 2.5 മണിക്കൂർ കൂടുതൽ ബാറ്ററി ലൈഫ് നൽകുമത്രേ.

​ഐഫോൺ 13 – ഡിസ്പ്ലേ

നാല് ഐഫോൺ 13 പതിപ്പുകൾക്കും ഡിസ്‌പ്ലെയുടെ വലിപ്പം മുൻഗാമികളുടെതിന് സമാനമാണ്. സ്ക്രീൻ സ്പേസ് വർദ്ധിപ്പിക്കുന്നതിനായി അതെ സമയം നോച്ച് 20 ശതമാനത്തോളം കുറച്ചിട്ടുണ്ട്. പ്രോ മോഡലുകളുടെ ആകർഷണം പ്രോമോഷൻ 120 ഹെർട്സ് റിഫ്രഷ് റേറ്റാണ്. ഓരോ ഉപയോഗം അനുസരിച്ച് 10 ഹെർട്സ് മുതൽ 120 ഹെർട്സ് വരെ ഡിസ്‌പ്ലെയുടെ റിഫ്രഷ് റേറ്റ് തനിയെ മാറും. ഐഫോൺ 13, മിനി മോഡലുകൾക്ക് ഡേടൈം ബ്രൈറ്റ്നസ് 800 നിറ്റ്സും, പ്രോ മോഡലുകൾക്ക് 1000 നിറ്റ്സുമാണ്. എല്ലാ ഐഫോൺ 13 മോഡലുകൾക്കും ഡോൾബി വിഷൻ, എച്ച്ഡിആർ 10, എച്ച്എൽജി പിന്തുണയുണ്ട്.

​​ഐഫോൺ 13 -ക്യാമറ

ഐഫോൺ 13, ഐഫോൺ 13 മിനി എന്നിവയ്ക്ക് പുതിയ വൈഡ് ആംഗിൾ ക്യാമറയാണ് ആകർഷണം. എഫ്/1.6 അപ്പേർച്ചറുള്ള 12 മെഗാപിക്‌സൽ വൈഡ് ക്യാമറ, എഫ് /2.4 അപ്പേർച്ചറിൽ 12 മെഗാപിക്‌സൽ അൾട്രാ വൈഡ് ക്യാമറ എന്നിവ ഉൾപ്പെടുന്നതാണ് ഈ മോഡലുകളുടെ ഡ്യുവൽ കാമറ. വീഡിയോ ഷൂട്ട് ചെയ്യുമ്പോൾ ഒന്നിലധികം സബ്ജക്ടുകളെ ഫോക്കസ് ചെയ്യാനും, ചലിച്ചുകൊണ്ടിരിക്കുന്ന സബ്ജക്ടിൽ വ്യക്തതയോടെ ഫോക്കസ് നിലനിർത്താനും സാധിക്കുന്ന പുതിയ സിനിമാറ്റിക് മോഡ് ഐഫോൺ 13ന്റെ പ്രധാന സവിശേഷതയാണ്. 3X ഒപ്റ്റിക്കൽ സൂം സൗകര്യമുള്ള 77എംഎം ടെലിഫോട്ടോ ക്യാമറ, എഫ്/1.8 അപ്പർച്ചർ, ഓട്ടോ ഫോക്കസ് സംവിധാനമുള്ള അൾട്രാവൈഡ് ക്യാമറ, എഫ്/1.5 അപ്പേർച്ചറിലുള്ള വൈഡ് ക്യാമറ എന്നിവയാണ് ഐഫോൺ 13ന്റെ പ്രോ മോഡലുകളിൽ ക്രമീകരിച്ചിരിക്കുന്നത്.

Related posts