‘ധോണിയുടെ നല്ല കാലം കഴിഞ്ഞു; യുവതാരങ്ങള്‍ക്കായി മാറിക്കൊടുക്കണം’

ന്യൂഡല്‍ഹിന്: ഇന്ത്യന്‍ ക്രിക്കറ്റ് ടീം മുന്‍ ക്യാപ്റ്റന്‍ എം.എസ്. ധോണി യുവതലമുറയ്ക്കു വേണ്ടി വഴിമാറിക്കൊടുക്കേണ്ട സമയമാണിതെന്ന് മുന്‍ ഇന്ത്യന്‍ താരം റോജര്‍ ബിന്നി. ധോണിയുടെ ഫിറ്റ്‌നസ് കുറഞ്ഞു വരികയാണ്. മുന്‍പ് കളിച്ചതുപോലെ ധോണിക്ക് ഇനി അധികകാലം കളിക്കാന്‍ സാധിക്കില്ല. യുവ താരങ്ങള്‍ക്കായി ധോണി മാറിക്കൊടുക്കണം. കഴിഞ്ഞ കുറച്ചു വര്‍ഷങ്ങളായുള്ള ധോണിയുടെ പ്രകടനം നോക്കിയിട്ടാണ് അദ്ദേഹത്തിന്റെ ‘നല്ല കാലം’ കഴിഞ്ഞെന്നു പറയുന്നതെന്നും റോജര്‍ ബിന്നി പ്രതികരിച്ചു.
1983ല്‍ ലോകകപ്പ് നേടിയ ഇന്ത്യന്‍ ടീമില്‍ അംഗമായിരുന്നു റോജര്‍ ബിന്നി. കരുത്തും സാമര്‍ത്ഥ്യവുമുപയോഗിച്ച് തോല്‍ക്കുന്ന അവസ്ഥയില്‍നിന്നു ധോണി കളി തന്നെ മാറ്റിയെടുത്തിട്ടുണ്ട്. സഹതാരങ്ങളെ പ്രോത്സാഹിപ്പിക്കാനും ധോണിക്കു സാധിച്ചിട്ടുണ്ട്. അദ്ദേഹത്തിന്റെ ഫിറ്റ്‌നസില്‍ കുറച്ചെങ്കിലും കുറവുണ്ട്. കൂടാതെ യുവതാരങ്ങള്‍ വന്നുകൊണ്ടിരിക്കുകയാണ്. ധോണിയുടെ ഏറ്റവും മികച്ചത് കടന്നുപോയി. ധോണി തന്നെയാണ് ഇക്കാര്യം മനസ്സിലാക്കേണ്ടത് ഒരു മാധ്യമത്തിനു നല്‍കിയ അഭിമുഖത്തില്‍ ബിന്നി പ്രതികരിച്ചു.
മുതിര്‍ന്ന ക്രിക്കറ്റ് താരങ്ങളെ ബഹുമാനിക്കാന്‍ ധോണി എപ്പോഴും തയാറായിരുന്നു. വളരെ സാധാരണക്കാരനായ വ്യക്തിയാണ് അദ്ദേഹം. ക്രിക്കറ്റ് താരങ്ങളോട് ഏറെ നേരം സംസാരിക്കാനും അദ്ദേഹത്തിന് എന്താണു വേണ്ടതെന്നു പറയാനും ധോണി എപ്പോഴും തയാറായിട്ടുണ്ടെന്നും ബിന്നി പറഞ്ഞു. 2012ല്‍ ബിസിസിഐയുടെ അഞ്ചംഗ സിലക്ഷന്‍ പാനലില്‍ അംഗം കൂടിയായിരുന്നു റോജര്‍ ബിന്നി. 2019ല്‍ ന്യൂസീലാന്‍ഡിനെതിരായ ലോകകപ്പ് സെമി ഫൈനലിന് ശേഷം ധോണി ഇന്ത്യയ്ക്കായി കളിച്ചിട്ടില്ല.
സൈന്യത്തില്‍ സേവനത്തിനു പോയ ധോണി തിരിച്ചെത്തിയ ശേഷവും ക്രിക്കറ്റില്‍നിന്നു വിട്ടുനില്‍ക്കുകയായിരുന്നു. ഐപിഎല്ലില്‍ ചെന്നൈ സൂപ്പര്‍ കിങ്‌സിനെ നയിച്ചുകൊണ്ടു ധോണി തിരിച്ചുവരുമെന്നു പ്രതീക്ഷിച്ചെങ്കിലും കോവിഡ് മഹാമാരി കാരണം ഐപിഎല്‍ നീട്ടിവയ്ക്കുകയായിരുന്നു. യുഎഇയില്‍ നടക്കുന്ന ഇത്തവണത്തെ ഐപിഎല്‍ സീസണില്‍ ചെന്നൈ സൂപ്പര്‍ കിങ്‌സില്‍ കളിച്ച് ധോണി ക്രിക്കറ്റില്‍ വീണ്ടും സജീവമാകുമെന്നാണ് ആരാധകരുടെ പ്രതീക്ഷ.

Related posts